Tgi succeda a Selma Mahlknecht ed Asa Hendry per il Premi Travers Zuoz 2026? Quai vegn fatg enconuschent durant la segunda emna da zercladur. Enfin als 15 matg 2026 ha ins pudì inoltrar ideas e concepts che vegnan evaluads en il decurs da las proximas duas emnas sin fundament d'ina giuria da tschintg persunas (guarda box).
E quai che fetscha ordvart plaschair tenor ils organisaturs saja il fatg che 17 ideas èn vegnidas inoltradas questa giada, uschè bleras sco anc mai. «Quai è in grond success per nus. En cumparegliaziun cun las ultimas duas ediziuns, nua che nus avain survegnì mintga giada 'be' ina deschina d'annunzias. Quai mussa era in pau ch'il Premi Travers è vegnì pli enconuschent en la Rumantschia ed era ch'il renum per quest premi è creschì durant ils ultims onns», manegia la manadra da gestiun da l'Uniun Travers, Gianna Olinda Cadonau tut intgantada envers la FMR ed agiunta: «La promoziun ed era la scena da teater contemporan vivan!»
2027 – in grond onn da festa
Tschertgadas èn vegnidas questa giada – auter da las emprimas duas ediziuns dal Premi Travers dal 2022 e 2024 – ideas per ina inscenaziun rumantsch cun be ina singula actura u actur sin il palc. Pia in monolog empè d'in teater cun pliras persunas, tranter 40 enfin maximalmain 60 minutas, che vegn lura inscenà durant il Festival Travers Zuoz la stad dal 2027.
Il motiv per questa midada ha cunzunt era da far cun il fatg che durant l'onn 2027 han lieu en collavuraziun cun la vischnanca da Zuoz, il Lyceum Alpinum Zuoz e la Lia Rumantscha grondas festivitads e diversas occurrenzas en tut la Rumantschia. Quai a chaschun dal giubileum da 500 onns dal emprim text scrit en rumantsch, «La Chianzun da la guerra dal Chiastè da Müs» da Gian Travers. Il Festival Travers Zuoz sarà il punct culminant da tut las festivitads, però l'inscenaziun dal Premi Travers sarà questa giada be in dals differents puncts d'in program pli vast. «Perquai ch'i dat tranter auter era in grond gieu liber durant il Festival Travers a Zuoz dal 2027, vegn il monolog ad avair in'autra paisa e na vegn questa giada betg ad esser il toc principal dal program», declera Gianna Olinda Cadonau vinavant.
Quai saja era stà il scopo perquai ch'ins saja vegnì encuraschà da restar pli simpel en la concepziun e pli pitschen en l'inscenaziun dal monolog. Ina da las ideas dals organisaturs fiss ch'ins pudess forsa schizunt ir sin turnea cun quest monolog. E perquai che tut saja pli pitschen questa giada – e per motivs da fairness era envers las ideas che han gudagnà il 2022 e 2024 – saja il premi vegnì adattà questa giada da 15 000 francs sin 10 000 francs.
Plaschair per tut quai che vegn anc
Davart la varietad da las ideas ch'èn vegnidas inoltradas na po e na vul la manadra da gestiun tradir actualmain anc nagut. Be uschè bler: il spectrum saja fitg vast, cun ideas per istorgias en plirs idioms e skizzas da figuras giuvnas e veglias en situaziuns da partenza fitg differentas per las protagonistas u ils protagonists. Ed al cumenzament da zercladur vegnia communitgà pli detagliadamain – sper l'annunzia da la victura u dal victur, apunta era davart tut las autras inoltraziuns.
En mintga cas cuntentian las ideas per il monolog cun l'emprima egliada fitg. Gianna Olinda Cadonau è involvida gist en trais funcziuns durant tut las festivitads da l'onn che vegn. Ina giada sco manadra da gestiun da l'Uniun Travers, al medem mument sco impiegada e manadra da cultura da la Lia Rumantscha e lura anc sco autura principala dal gieu liber. Pia bler da prender per mauns per in onn da festa remartgabel, betg be per l'Uniun Travers, mabain per tut la cultura rumantscha.
E che be uschè bler as possia gia dir: il toc dal gieu liber na vegn betg a far in sguard enavos, mabain vegn ad esser «ina celebraziun dal oz», concluda Gianna Olinda Cadonau il discurs senza vulair tradir anc memia bler.