Il cussegl communal da Zuoz haja dumandà l’Uffizi chantunal per valitar danovamain la situaziun da la cruschada Resgia. Sin basa d’ina uschè numnada «ROAD Safety Inspection», proponia il chantun uss da realisar ina rundella per l’access da la vischnanca ord la via da sviament.
Valitaziun ambivalenta
Per la suprastanza communala dessi tant avantatgs sco er dischavantatgs cun remplazzar la cruschada cun ina rundella. La diminuziun dal privel valitescha il cussegl positiv. La vischnanca purtass 400'000 francs vi dal project che vegn a custar radund 700’000 francs. Pli problematic vesa il gremi che la canera s’augmentass, causa ch’ils automobilists hajan da franar e puspè accelerar avant e suenter la rundella.
Ulteriuras investiziuns
La realisaziun d’ina rundella haja er consequenzas per l’entir areal enturn la cruschada, surtut cun investiziuns en connex cun il traffic plaun, uschia il president communal, Andrea Gilli. Il project concret per la rundella vegnia uss elavurà da l’uffizi chantunal. Prevesida saja ina realisaziun per il 2024, scriva la vischnanca da Zuoz en ina communicaziun.
