Siglir tar il cuntegn

Zuoz Credit transitoric da 10 milliuns per ina nova sutgera

Per ina da las trais sutgeras sur Zuoz vegn a finir suenter 20 onns la concessiun da manaschi. La sutgera «Pizzet» na duai betg vegnir sanada, ma remplazzada cun ina nova sutgera. La possessura «Sutgeras e runals Zuoz SA» - curt SSZ SA - n’ha però betg ils meds finanzials per finanziar il project da 10 milliuns francs.

La gestiun porta sasezza. Però na pudain betg far grondas investiziuns cun questa svieuta che nus avain.
Autur: Flurin Wieser mainagestiun da la SSZ SA
Flurin Wieser steht in einer Halle.
Legenda: Il mainagestiun da la SSZ SA Flurin Wieser. RTR

Vischnanca duai finanziar

L'acziunaria principala da la SSZ SA è per il mument cun bundant 47% da las aczias la vischnanca da Zuoz. Tenor il plan da la SSZ SA vul'ins auzar il chapital d’aczias cun l'import da 10 milliuns francs per pudair finanziar la nova sutgera «Pizzet». La vischnanca da Zuoz fiss previsa era vinavant dad esser l'acziunaria principala cun minimal 51% da las aczias.

Ussa dumonda la vischnanca il zercladur la populaziun per in credit transitoric da 10 milliuns francs per che la planisaziun da la nova sutgera «Pizzet» possia cumenzar. La fin da l’onn duain lura vegnir signadas las novas aczias.

Romeo Cusini lächelnd in einem Labor.
Legenda: Il president communal da Zuoz Romeo Cusini. RTR

La speranza sin il rest dals acziunaris

Sch'ils 10 milliuns da la vischnanca da Zuoz vegnian lura propi duvrads cumplettamain per la construcziun da la nova sutgera, n’è betg anc cler. Per il president communal sco era il maina-gestiun saja l'investiziun da la vischnanca en il meglier cas 5,1 milliuns francs per 51% da las aczias. En il pli nausch cas duai la vischnanca surpigliar 100% da las aczias cun ina valita da 10 milliuns francs. Quai dependa però era dals auters acziunaris, sche quests èn pronts sa cumprar ina part da las aczias novas.

Debits vegls en ils cudeschs duain vegnir scrits giu

En ina segunda dumonda da la SSZ SA duain ils votants e las votantas decider, sche la firma po scriver giu debits da 11,5 milliuns francs envers la vischnanca Zuoz. Quella ha gia scrit giu ils debits en ses cudeschs. Tuttas duas chaussas duain vegnir tractadas en la radunanza communala dal zercladur da quest onn.

RTR actualitad 11:00

Artitgels legids il pli savens