Per pudair organisar l’eveniment il 2024 è vegnida fundada ina societad. Il president da quella è Martin Aebli. L’anteriur president communal da Puntraschigna vegn er ad esser il president dal comité d’organisaziun. En tut vegn fatg quint cun tranter 6’000 fin 8’000 tiraduras e tiradurs. Il budget munta a 1,6 milliuns francs.
Preparar ils lieus
Sco che Martin Aebli ha infurmà il venderdi a Zuoz, vegnan ad esser en funcziun tranter 12 e 14 implants da tir per la festa. Quai per las distanzas classicas da 300 meters cun la buis e 25 respectivamain 50 meters cun la pistola. Sche pussibel duai vegnir sajettà en Engiadin'Ota, Engiadina Bassa, la Val Müstair, il Puschlav, la Val Bregaglia e da nov perfin er en il Mesauc.
L’ultim inscunter chantunal è stà il 2018 en Surselva. L’eveniment sportiv ha lieu per regla mintga tschintg onns.