La vischnanca da Zuoz ha publitgà la tractanda otg dis avant la radunanza communala ch'è previsa ils 30 avrigl 2025. Uss è quella vegnida spustada sin ils 25 zercladur.
Il motiv
Tenor la constituziun communala che vala a Zuoz ston las radunanzas vegnir publitgadas almain 5 dis avant, ma la lescha superiura chantunala prevesa in minimum da 10 dis. La revisiun da la lescha chantunala ha gì lieu il 2017 ed è valabla dapi il prim da fanadur 2018.
En cas d'in recurs n’avess la vischnanca nagina schanza.
In persuna ch'abita a Zuoz ha pia infurmà la vischnanca ch’els cuntrafetschian a la lescha superiura. Il cussegl communal ha sinaquai immediat reagì e decis – ensemen cun dus giurists – d'abolir la radunanza planisada e spustar quella sin ils 25 da zercladur 2025.
Il sbagl è ina schanza
Il president communal, Romeo Cusini, vul ussa meglierar il text da la missiva e pli tard era surlavurar la constituziun communala per adattar quella a la lescha da vischnancas chantunala dal Grischun.
