Areguard ils uffizis forestals e las gruppas da lavur communalas collavuran las vischnancas da Zuoz e S-chanf dapi l’onn 2014. Uschia maina il selvicultur da S-chanf ils dus uffizis forestals ed il manader tecnic da Zuoz maina las gruppas da lavur communalas. Plinavant è la vart da Zuoz era responsabla per l’infrastructura da las duas vischnancas – tranter auter era per il provediment da l’aua.
Questa collavuraziun vegn regulada cun ina cunvegna che avess stuì vegnir prolungada suenter in temp da prova definì a la fin da l’onn 2023. Il 2022 è gia ina giada vegnì prolungà la cunvegna per dus onns cun la finamira d’adattar la collavuraziun surtut en la sparta dal lavuratori. Sco che la populaziun da Zuoz è vegnida infurmada a la radunanza communala dals 27 da mars, ha il cussegl communal da S-chanf decis la fin da l’onn 2023 da visar questa cunvegna da collavuraziun pertutgant la gruppa per lavurs communalas e la gestiun forestala. Suenter ina fasa transitorica fin als 30 avrigl 2024 ha puspè mintga vischnanca in lavuratori communal.
Dapli servetschs, medems custs
«Or da nossa vista era questa collavuraziun ina buna chaussa ed ins ha pudì profitar da bleras sinergias. Ma la vart da S-chanf n'è betg adina stada cuntenta cun las prestaziuns areguard la gruppa da lavur communala», ha ditg Patrick Steger, il chanzlist communal da Zuoz. Suenter diversas discussiuns eran las duas vischnancas perina e Zuoz avess sviluppà vinavant il servetsch e fiss er stà pront d’engaschar dapli persunal per cuntentar ils basegns da S-chanf. Ma tenor Zuoz na vuleva S-chanf betg pli sa participar vi dals custs. «Uschia ha Zuoz acceptà la disditga da la cunvegna per la fin dal 2023 ed il cussegl communal da Zuoz è stà d'accord da surpigliar las lavurs existentas per in temp transitoric dal 1. schaner 2024 fin ils 30 d’avrigl 2024», declera Patrick Steger.
Grond territori communal
Sco che la vischnanca da S-chanf ha declarà envers la FMR, eran ins cuntent cun la collavuraziun. Ed ins haja er vulì collavurar vinavant cun Zuoz – ma cun adattar la cunvegna, uschia che S-chanf survegn in’atgna gruppa da lavur communala. Il president communal, Riet Campell, di: «S-chanf, cun tut sias fracziuns, ha in grond territori e nus duvrain in agen lavuratori communal en la vischnanca per reagir meglier. Plinavant pon ins er profitar da sinergias cun il lavuratori forestal.» Che S-chanf haja perquai fatg la proposta d’adattar la cunvegna en quest punct e da vulair collavurar vinavant cun Zuoz areguard il forestal ed il provediment da l’aua. «Nus avain a la fin stuì visar la cunvegna per la fin dal 2023 e spetgain ina resposta cura che Zuoz vul collavurar vinavant cun il forestal ed il provediment d’aua», ha ditg Riet Campell.
Questa decisiun signifitgescha che Zuoz sco er S-chanf han a partir dals 1. matg 2024 puspè mintgin in’atgna gruppa da lavur communala sco er in agen lavuratori communal. Entant che a Zuoz resta – areguard l’uffizi tecnic – tut sco usità, daventa a S-chanf il custodi Roman Graf il schef dal lavuratori communal cun dus lavurants ch'èn suttamess ad el. «La finamira da la suprastanza è ch'il lavuratori duess prestar en avegnir las lavurs da mantegniment da las vias, sendas e stabels, cultivar ils santeris, gestiunar ils «molocs» e l’enviern er dar sustegn tar la rumida da naiv», declera Riet Campell.
Selvicultur da S-chanf resta responsabel
Sco che la collavuraziun futura areguard il provediment d’aua guarda però ora a la fin, quai è tenor il chanzlist da Zuoz anc en discussiun.
Areguard la collavuraziun forestala è la chaussa in pau pli cumplitgada, cunquai ch'il chantun è er anc involvà. Uschia dat quai contracts tranter las duas vischnancas ed il chantun, che defineschan ch'il selvicultur da S-chanf saja responsabel per il revier da guaud, che cumpiglia il territori da Zuoz e S-chanf. «Questa cunvegna resta e na po betg be vegnir visada d’ina vart. Quai che sa mida en futur è che la gestiun dal guaud – sco tagls etc. – è puspè chaussa da las vischnancas sezzas», declera il chanzlist da Zuoz. Quai vul dir che Zuoz po decider sez sche las lavurs forestalas vegnan fatgas da la gestiun forestala da S-chanf, u alura d’insatgi extern.