Tenor il plan directiv regiunal per la construcziun d'abitaziuns secundaras sto mintga vischnanca manar protocol davart la surdada da contingents per abitaziuns secundaras ed inoltrar quest protocol al circul. Las cifras da Zuoz hajan fatg surstar, uschè Annemarie Perl, vicepresidenta dal cussegl cumön.
Inoltrà recurs da surveglianza
Il circul ha sin quai inoltrà in recurs da surveglianza tar la regenza dal chantun Grischun cun la supplica che Zuoz revocheschia las lubientschas sche las lavurs da construcziun fissan vegnidas dadas libras suenter il 2014. Plinavant duai in cumissar da la regenza far il proceder da revocaziun.
La regenza ha dà in’admoniziun a Zuoz e decis ch’ella po far sezza il proceder da revocaziun cun infurmar la regenza davart quest.
Tenor vischnanca da Zuoz è tut correct
Il president communal da Zuoz, Flurin Wieser, è consternà davart l’agir da la suprastanza dal cussegl cumön. El n'haja betg savì da la communicaziun che va ora gievgia. Segund è el da l’avis che tut è correct. Els hajan duvrà il contingent ch’els hajan a disposiziun.
E tenor la regenza stoppian els unic reponderar ils permiss, quai ch’els vulan era far. Entant saja il cas per el ina procedura currenta.
Il chantun declera tge che Zuoz sto far ussa
Tenor il departament d’economia publica dal Grischun ston tut las partidas involvidas vegnir valitadas tar ina revocaziun dal permiss. Sch’i dettia motivs impurtants da na betg revocar in permiss alura pudess quel restar en vigur. Quai er per na chastiar quel che ha survegnì il permiss da bajegiar e che n’ha betg fatg insatge fallà. Uschia pudessi dar che tut ils 7 permiss per bajegiar abitaziuns secundaras restan valaivels.
RR novitads 14:00