A Zuoz hai dà mardi avantmezdi ina collisiun frontala tranter dus autos. Ina persuna è morta e trais ulteriuras persunas èn vegnidas blessadas, sco la polizia chantunala communitgescha.
Ina manischunza da 72 onns era da viadi cun ses partenari da 70 onns da l'Engiadina Bassa en direcziun Samedan. A Zuoz è l'auto vegnì sin l'auter vial ed è lura collidà frontalmain cun in auto da furniziun ch'è vegnì encunter. Ulteriurs participants al traffic han prestà emprim agid ed han alarmà las forzas da salvament. La media da la Rega ha lura anc empruvà da reanimar l'um da 70 onns, el è dentant anc mort al lieu. La dunna è vegnida transportada cun blessuras mezgrevas a l'ospital a Samedan. Ils dus umens che sesevan en l'auto da furniziun èn vegnids blessads levamain. En consequenza da l'accident è la via tranter Zuoz e Cinuos-chel stada serrada per passa trais uras.
En funcziun èn stads la Rega, il salvament da l'Engiadin'Ota e l'agid stradal dals pumpiers da Plaiv. La procura publica e la polizia chantunala dal Grischun investigheschan uss quest cas.