Suenter ina fasa da test durant ils dis da festa, vul la Scola da skis svizra Zuoz-La Punt porscher als scolars e las scolaras in’aventura pli speziala ina giada l’emna, e quai sper la pista. Ils uffants pon passentar a partir dal favrer mintgamai la mesemna suentermezdi – er sin ils skis – dentant davos in chaval.
Ils uffants han anc adina grond plaschair dad ir cun ils skis e quai duai er restar en il center. Dentant datti en Engiadina anc bler da pli da porscher e quai vulain nus mussar, per exempel cun il sport da Skijöring.
L’emprim en gruppas da var quatter uffants tira in chaval els cun ina suga davos sai, pli tard dat la chavaltganta il cumond per augmentar il tempo e l’animal tira in singul skiunz er al galop davos sai.
Tenor il manader da la scola, Gudench Campell, restia il focus sin l’instrucziun da skis e snowboard. Dentant saja in’attracziun sco il skijöring in midament bainvesì e prezià tar la clientella.
Premissa per sa participar als sport cun chaval e skis, saja dad esser segir sin ils skis. Perquai vala la purschida per il mument per ils scolars e las scolaras da las classas da la «Black League».