Il preventiv 2023 da la vischnanca da Zuoz fa quint cun in minus da bun 365'000 francs. La situaziun finanziala da la vischnanca saja dentant buna, uschè ch’il pe da taglia possia vegnir sbassà sin 65 %, uschè il vice-president Ramun Ratti envers RTR.
La radunanza communala ha approvà mesemna saira il preventiv unanimamain ed il sbassament dal pe da taglia cun 46 cunter 4 vuschs.
Ina vischnanca n’ha betg la funcziun da collecziunar raps.
Actualmain èn plirs projects pir en la fasa da planisaziun. Tut tenor investiziuns e situaziun finanziala avess il pe lura da vegnir adattà.
Chalandamarz er cun mattas
A partir dal proxim onn duain tut ils uffants da scola sa participar a l’usanza da Chalandamarz. Enfin uss eran involvids en il cortegi be ils mats. Sco ch’i è vegnì infurmà a la radunanza communala, elavuria la cumissiun da Chalandamarz ils detagls en tge furma che las mattas vegnan a sa participar a la tradiziun.
