Siglir tar il cuntegn

Header

Navigaziun

cuntegn

Zuoz Zuoz refusa ina proposta per dapli protecziun d'auas

Pertutgà èn surtut ils purs e quels n'èn betg d'accord cun la proposta fatga da la vischnanca. Tenor els èn las zonas da protecziun memia grondas, uschia ch'els perdessan grondas parts da lur prads agriculs.

Sco tut las vischnancas svizras sto era Zuoz adattar la planisaziun locala a la lescha federala per la protecziun d'auas. Zuoz ha perquai suttamess al suveran ina proposta ch'aveva previs da dezonar tranter auter zonas lung l'En en zonas da privel. En questas zonas cultiveschan tut ils purs da Zuoz terrain. Sco consequenza na pudessan ils purs betg pli metter ora puschina e sch'i dess in'inundaziun na vegnissan ils prads betg pli rumids.

Ils purs han perquai mobilisà per la radunanza communala da mesemna saira quai che ha manà ad in NA a la revisiun parziala. Uss va il project enavos sin champ in, i dovra ina nova evaluaziun ed ina nova proposta. Tenor il president communal Andrea Gilli vegn quai a durar in onn ed a custar la vischnanca radund 20'000 francs.

GEA a cunvegna cun regiun

Approvà unanimamain ha Zuoz la cunvegna da prestaziun cun la regiun per il center da sport sin glatsch. Pir cur che tut las 12 vischnancas da la regiun Malögia acceptan la cunvegna, vegn il project d'in center da sport sin glatsch en Engiadin'Ota elavurà vinavant. Tar las votaziuns il favrer 2019 ha mo la vischnanca Bregaglia refusà stgars il project.

Quint 2018

Vinavant ha la radunanza communala approvà unanimamain il quint da l'onn passà. Quel serra cun in gudogn da 38'000 francs. Las entradas sco era las expensas han muntà mintgamai var 12,5 milliuns francs. Il bun resultat saja dad ina vart la consequenza d'ina buna disciplina tar las expensas. Da l'autra vart sajan las entradas d'impostas stadas pli autas che planisà.

L'onn 2018 ha la vischnanca investì stgars 4 milliuns francs, quai surtut en projects d'infrastructura sco vias, chanalisaziun u provediment d'aua.

RR novitads 06:00