Tar il cas da cugliunaria tar la Repower gievi per il suandant: Tranter il november 2009 e l'avust 2011 aveva in collavuratur da la Repower cugliunà il concern per radund 5,8 milliuns francs. Schebain el sco er ses cumpliz eran vegnids sentenziads da la Dretgira chantunala a 42 mais praschun e chastis ed indemnisaziuns a la Repower.
Er involvida en il cas è ina terza persuna che haja gidà da lavar ils daners. Tar quella persuna n'èsi però anc betg decis, sch'ella sto pajar in'indemnisaziun a la Repower per ils daners engulads u betg. La Dretgira chantunala n'aveva prendì nagina decisiun en chaussa cun l'argumentaziun che quai duvrass in process supplementar.
Il Tribunal federal curregia uss dentant quai e di che la Dretgira chantunala avess gì da decider en chaussa. Uschia turna la dumonda da l'indemnisaziun per la terza persuna involvida tar la Dretgira chantunala.
