Il Landquart Outlet prosperescha – mintg'onn saja in nov onn da record. Per cuntinuar a quella moda e maniera vegn il vitget da cumpra engrondì per 5'000 meters quadrat cun 15 novas chasettas, sco era cun ina chasa da parcar cun quatter plauns e 1'200 parcadis. 200 novas plazzas da lavur vegnian stgaffidas atras l'engrondiment – uschia ch'i vegnian a partir da mez avrigl a lavurar en tut enturn 800 collavuraturas e collavuraturs en l'outlet.
Quest svilup vegn beneventà da la vischnanca da Zezras. Malgrà ch'il num «Landquart Outlet» sa chatta numnadamain 95% da sia surfatscha sin il territori da Zezras. Tenor il president communal, Daniel Freund, è il Landquart Outlet in'impurtanta part da las entradas che l'industria ed il commerzi portan en la cassa communala. Radund in terz da las entradas da taglia da la vischnanca vegnian da l'industria ed il commerzi.
-
Bild 1 von 8. L'outlet a Landquart. Bildquelle: RTR.
-
Bild 2 von 8. Bildquelle: RTR.
-
Bild 3 von 8. Aleksandra Perz, la directura da l'outlet a Landquart. Bildquelle: RTR.
-
Bild 4 von 8. Daniel Freund, president communal da Zezras. Bildquelle: RTR.
-
Bild 5 von 8. Qua duai dar 15 novas chasettas. Bildquelle: RTR.
-
Bild 6 von 8. 200 novas plazzas da lavur èn prevesidas. Bildquelle: RTR.
-
Bild 7 von 8. Bildquelle: RTR.
-
Bild 8 von 8. Bildquelle: RTR.
L’outlet ch’aveva avert sias portas l’onn 2009 cun il num «Alpenrhein Village» aveva dentant ina partenza difficila. El ha gì fadia d'emplenir tut sias localitads. Igl ha dà fasas nua che mo in terz da las butias èn stadas avertas. Dapi che la gruppa da gestiun «VIA Outlets», che maina plirs outlets en l'entira Europa, ha l’onn 2014 surpiglià il center, èsi dentant in'istorgia da success. Oz attira il center che ha avert set dis l'emna radund dus milliuns visitaders ad onn cun fin 14'000 clients e clientas durant dis da grond travasch. Il traffic che quai caschuna – surtut durant las fins d'emna ed ils firads – procura magari era per critica.