Total d'emprendissadis
En Svizra dettia bunamain 260 emprendissadis differents ed en il Grischun circa 160. I saja però da menziunar che da tscherts emprendissadis pli «exotics» dettia mo mintga pèr onns ina giada ina plazza. Quai ha ditg Ramon Fontana da l'Uffizi per furmaziun professiunala sin dumonda.
Situaziun en il Grischun – Plazzas betg occupadas
Sch'ins cumpareglia las cifras da las plazzas anc scrittas ora la fin fanadur dals davos onns, vesan ins ch'igl aveva quest onn varga 100 dapli plazzas anc betg occupadas che l'onn 2020.
Quest svilup sa laschia explitgar cun il fatg ch'ils giuvenils e las giuvenilas da quest onn tutgian tar in'annada cun pli paucas naschientschas. Quest onn dettia bunamain 500 mats e mattas da 16 onns pli pauc che l'onn 200. Natiralmain dettia era giuvens e giuvnas d'auters chantuns che fan lur emprendissadi en il Grischun – i dettia però era il fenomen cuntrari.
Situaziun en il Grischun – Contracts approvads
Il dumber dals contracts d'emprendissadi approvads è restà stabil ils davos trais onns.
Quellas cifras na possian ins dentant betg cumparegliar cun il dumber da plazzas betg occupadas. Ramon Fontana declera ch'annunziar las plazzas d'emprendissadi avertas saja ina chaussa voluntaria. Uschia dettia manaschis che n'annunzian betg lur plazzas avertas entant ch'auters annunzian pliras – per exempel ina AFP (EBA) ed ina AFQ (EFZ) era sch'i dat mo ina plazza.
Plazzas d'emprendissadi dastgan vegnir scrittas ora fin a la fin da settember e pon vegnir approvadas fin mez october. Quai saja ina sort schanza per persunas che vulan anc midar u ch'han pir chattà tard ina plazza e pon uschia cumenzar pli tard.
Popularitad
Da principi èn anc publitgadas da tut las branschas emprendissadis cun cumenzament 2022. Sco era gia en ils davos onns hajan cunzunt las branschas da construcziun, construcziun secundara e da l'hotellaria e gastronomia fadia d'occupar lur plazzas. En general saja il martgà da plazzas d'emprendissadi en il Grischun stabel.