Siglir tar il cuntegn

Header

cuntegn

Grischun Enviern: Buna entschatta ma schletta finiziun?

Quest enviern hai dà blera naiv. Uschia è il cumenzament da stagiun gartegià. E grazia a las navaglias hai anc adina avunda naiv per ir cun skis da Pasca. Dentant para l'aura da far in stritg tras il quint.

La blera naiv ha fatg plaschair a turistichers e hoteliers. La stagiun d'enviern ha cumenzà bain. Schebain Jürg Schmid, president da Grischun Vacanzas, sco era Ernst Wyrsch, president da hotelleriesuisse Grischun avevan tratg ina buna bilantscha l’entschatta favrer. D'ina buna stagiun possian ins surtut discurrer sch'i fetschia lura anc bell'aura la fin da la stagiun. L'aura da Pasca è dentant tut autra che empermettenta.

audio
Mezdi: Territori da skis Sursaissa Mundaun
ord Actualitad dals 02.04.2018.
laschar ir. Durada: 2 minutas 23 Secundas.

Sursaissa ha ditg giu cursa cun Carlo Janka

A Sursaissa eri planisà in grond event sco finiziun da la stagiun: ins avess gì la pussaivladad da far ina cursa encunter Carlo Janka e mirar, quant pli plaun ch'ins è. Pervia da la previsiun da l'aura pauc plaschaivla è l'eveniment vegnì stritgà. Quai saja stada la dretga decisiun, di Reto Pfister, schef da pista da las pendicularas Sursaissa Mundaun. Cun 13 pertschient dapli giasts che l'onn avant sajan els cuntents. Sch'il sulegl fiss sa mussads pli savens fiss la bilantscha anc meglra.

audio
Saira: Territori da skis Mustér
ord Actualitad dals 02.04.2018.
laschar ir. Durada: 1 minuta 50 Secundas.

Pendicularas Mustér serran pli baud

A Mustér va la stagiun regulara anc enfin ils 8 d'avrigl. Suenter èsi mo pli avert las fins d'emna e d'Ascensiun e da Tschuncaisma, ord motivs da construcziun. Rudolf Büchi, manader da fatschenta da las pendicularas Mustér ha adina plaschair da la naiv. El conceda dentant ch'i fissi stà bel, d'avair anc in zic sulegl per la finiziun da la stagiun. Ils freeriders hajan dentant plaschair da la naiv nova.

Skiunzs che van da tutta aura cun skis en il territori da skis da Mustér.
Legenda: Per ils freeriders n'è quest aura betg schletta aura. RTR, Angela Hendry

RR actualitad 08:00

Artitgels legids il pli savens