In triumf suenter l’auter ha la medischina pudì festivar ils ultims decennis. Per bleras sorts da cancer – cunzunt da quellas che pertutgan uffants – existian oz terapias, di Flurin Condrau, istoricher da medischina.
Grazia a l’antibiotica sajan bleras malsognas mortalas daventadas be pli in problem da rutina. Ins possia prender intginas pirlas e suenter duas emnas sajan ins saun.
La medischina ans ha fatg crair che nus daventain segir vegls.
Cun la pandemia da corona vegnian talas tschertezzas forsa reponderadas. I fetschia bain da puspè ina giada vegnir pertschart che la vita ha ina fin, di l'istoricher e sociolog.
La mort haja nossa societad bandischà en las chasas da vegls u en staziuns palliativas. En il fratemp possian ins en Svizra decider sez cun agid dad organisaziuns da murir cura ch’ins less terminar la vita.
La mort senza fatscha
En la pandemia da corona cumpara la mort savens en furma da cifras: il dumber da morts en mintga pajais u la procentuala da mortoris per mintga vegliadetgna. Per part èsi gnanc pussaivel da prender part a sepulturas pervia dal scumond da sa radunar.
La mort daventa uschia invisibla.
Durant la grippa spagnola vesevan ins or da tge chasas ch’ins purtava ils morts. La mort era pli baud amez la societad, di Flurin Condrau.