Siglir tar il cuntegn

Header

cuntegn

Grischun Er en futur duai l'armada gidar a segirar il WEF

Ils onns 2019 fin 2021 pon vegnir en funcziun fin 5'000 schuldads per mesiras da segirezza durant il WEF a Tavau.

Il Cussegl dals chantuns ha decidì unanimamain che l'armada sustegnia vinavant il chantun Grischun durant il WEF. L'interess ch'il WEF vegnia realisà a Tavau saja fitg grond. Quai giustifitgeschia ina participaziun da l'armada.

Ils onns 2019 enfin 2021 pon vegnir en funcziun mintgamai 5'000 schuldads per mesiras da segirezza. Ils custs muntan a 32 milliuns francs. Che quest import è pli aut ch'ils onns precedents, ha da far cun la situaziun da segirezza pli rigurusa en Europa. I na sa tractia qua però betg da custs supplementars, perquai ch'ils curs da repetiziun custian tuttina bler.

Ultra da quai duai la Confederaziun vinavant sa participar als custs per la segirezza. Il Cussegl dals chantuns ha approvà d'auzar la summa dad 8 sin 9 milliuns francs ad onn. Da quests custs surpiglia la Confederaziun 3,3 milliuns, il WEF sez 2,2 milliuns ed il rest partan il chantun Grischun e la vischnanca da Tavau.

Sco proxim decida il Cussegl naziunal en chaussa.

RR novitads 12:00

Artitgels legids il pli savens