Siglir tar il cuntegn

Header

Navigaziun

Legenda: Tadlar il audio Bunura: In predi avant in milliun persunas. Durada 03:12 minutas.
03:12 min, Actualitad dals 20.04.2019.
cuntegn

Grischun Erich Wyss: In predi avant in milliun aspectaturs

Il plevon evangelic Erich Wyss sa legra sin la dumengia da Pasca. Ses servetsch divin en la baselgia Son Martin a Cuira vegn emess betg mo en Svizra mabain en plirs pajais.

Uschè blers auditurs ha il plevon Erich Wyss probablamain anc mai gì: «Enturn in milliun aspectaturs vegnia a dar, sco il reschissur da televisiun ha ditg a mai», sa legra Erich Wyss. Sper la Svizra vegn il servetsch divin era emess en Frantscha, en Italia ed en ils pajais da Benelux.

Tut è planisà sin la secunda

Erich Wyss ha avant sia carriera spirituala fatg la scola d'acturs. Tras quai ha el gia ordavant savì che l'ura vegn a giugar ina gronda rolla. Il plevon evangelic ha numnadamain stuì dar giu ses predi duas emnas avant per ch'ins sappia translatar ils text en tut ils linguatgs. Vinavant na dastga el betg variar en ses predi. El sto sa tegnair vid il script e na po betg esser spontan sco normalmain durant ses servetsch divin.

Dapli «action» per la televisiun

Sco Erich Wyss declera na sappian ins betg pli simplamain far in predi sur in'ura e la glieud chatta quai anc adina interessant. Surtut en la televisiun è quai impurtant per ch'ins perdia betg aspectaturs. Uschia ha el empruvà da bajegiar en avunda variaziun. Tranter auter cun agid d'in chor da jodel e plirs pleds en ils trais linguatgs dal Grischun.

A la televisiun

Il servetsch divin dal plevon Erich Wyss pon ins vesair questa dumengia a las 10:00 sin SRF1.

RR actualitad 07:00