En il Grischun survegnan las scolas en alloschis collectivs bunas notas. Quai mussa il rapport da l’Uffizi per la scola populara ed il sport. Quel suttastritga surtut la gronda cuntentientscha e motivaziun da scolastas e scolasts ed il fitg bun clima en scola. Era saja l'atmosfera d'emprender fitg positiva ed ils uffants sa sentian bain. En il chantun Grischun van uffants ch'èn en ina procedura d’asil u ch’èn admess provisoricamain a scola en las scolas dals alloschis collectivs.
Las scolas en alloschis collectivs vegnan valitadas sco las scolas popularas publicas. Cun l'evaluaziun vegnan giuditgadas la realisaziun dal concept da scola, la qualitad da l'instrucziun e l'atmosfera en scola. Dumandads èn vegnids scolaras e scolars, persunas responsablas per l'educaziun, persunas d'instrucziun e las direcziuns da las scolas popularas publicas sco er las persunas responsablas da l'Uffizi da migraziun e da dretg civil.
