Durant bels dis chauds va la colonna avant il café e la gelateria Evviva sin il Kornplatz a Cuira magari sur l'entir plaz. Il concept è nunusità: Persunas cun restricziuns cognitivas u psichicas lavuran en cuschina, al buffet ed en il service. Quai fan els ed ellas cun sustegn da persunas senza handicap, sco per exempel Cilgia Dolf da Cuira. Ils clients dal Plankis fetschian tut las lavurs, tut tenor dovrian els sustegn, per exempel sch'i giaja per incassar. Sfidas spezialas en il mintgadi da lavur na dettia dentant naginas.
Igl è sco en mintg'auter manaschi nua che glieud lavura ensemen.
I saja impurtant che las persunas cun handicap possian far ina lavur quotidiana en il café inclusiv. Gia passa dus onns accumpogna e sustegna Cilgia Dolf differents clients e clientas dal Plankis tar lur lavur en l'Evviva.
La lavur qua dat ina structura dal di als clients ed a las clientas. Els sentan ch'els èn impurtants per il manaschi, ch'els èn er part da la societad e ch'els tutgan vitiers.
Dapi l’avrigl da quest onn è la lavur en l'Evviva er daventada mintgadi per Joel Thurneysen. Fin uss al plascha la lavur. Il pli gugent fa el urden sin las maisas ed emplenescha las bavrondas. Ina «veglia vulp» en il manaschi inclusiv è Carla Stäuble, ella lavura gia dapi set onns en l'Evviva.
Jau sun gugent al buffet ed en il service. Cun cifras hai jau dentant in zic fadia.
-
Bild 1 von 5. La clientella ha la schelta tranter passa 20 differentas sorts da glatsch. Bildquelle: RTR.
-
Bild 2 von 5. Joel Thurneysen lavura dapì l'avrigl da quest onn en l'Evviva. Ad el plascha sia lavur. Bildquelle: RTR.
-
Bild 3 von 5. Carla Stäuble e gia ina «veglia vulp» en l'Evviva, gia set ons lavura ella en il café inclusiv. Bildquelle: RTR.
-
Bild 4 von 5. La colonna per ir per in glatsch è magari fitg lunga – ma i para da render da spitgar per il bun glatsch che vegn fatg sez dal Plankis. Bildquelle: RTR.
-
Bild 5 von 5. Da bell'aura pon ins giudair in café u in glatsch sin la terrassa da l'Evviva sin il Kornplatz. Bildquelle: RTR.
Ils resuns dals osps da l'Evviva èn positivs. Il concept inclusiv saja ina buna chaussa, il service saja fitg cordial ed ils products buns. In u l'auter vegn sapientivamain en l'Evviva per sustegnair la buna chaussa. En l'Evviva sin il Kornplatz a Cuira è l'inclusiun mintgadi.