«Doppelmord in der Langstrasse» è stà l’emprima story che Pierina Hassler ha scrit per il Blick. Ella haja svelt sentì quant lunsch ch’ins dastgia ir sco schurnalista da boulevard. Ella na fiss mai sa vestgida sco tgirunza mo per pudair far in’intervista cun in pazient en in spital.
Ins senta sche la glieud vul raquintar insatge e sto respectar sch’els vulan betg pli dir dapli.
La redacziun dal Blick discuteschia mintga di quant lunsch ch’ins dastgia ir, di Claudio Candinas. Gist en il sectur da social media raquintian ins istorgias che muventian la glieud e procurian per interacziuns.
Per mai vala la regla – tge che ha da far cun blessads e cun uffants na purtain nus betg.
Bun schurnalissem da boulevard tutga adina il venter e n’emblidia mai il chau, di Claudio Candinas. La glieud legia gugent insatge legher che fa tschaffen. Las infurmaziuns stoppian perquai tuttina constar.
Igl è scrit che mintgin chapescha, di Pierina Hassler. Il boulevard vegnia adina cun novs temas e stettia lura vidlonder.
Da scriver simpel e pregnant saja fitg grev, dian ils ex-collavuraturs. Perquai saja il Blick ina buna scola per giuvens schurnalists.
Omadus èn inchantads dal temp ch'els han passentà tar il Blick.
Jau n’hai – avant e suenter – mai lavurà cun glieud uschè intelligenta sco tar il Blick.
RR actualitad 07:00