-
Bild 1 von 3. Flurin Jacomet – maturand al gimnasi da la claustra da Mustér. Bildquelle: MAD.
-
Bild 2 von 3. Svenja Kaib – maturanda a la scola chantunala a Cuira. Bildquelle: MAD.
-
Bild 3 von 3. Aljosha Rietmann – FMS a Glion. Bildquelle: MAD.
Quai vi e nà da «avain nus ils examens finals u betg e sche gea mo a scrit ni era a bucca e con bler quintan las notas finalas insumma?» haja custà blera gnerva als scolars che fan la matura u la scola media spezialisada (FMS).
Per oz è vegnì communitgà ch'era la FMS na sto betg far examens a bucca. In dad els è Aljosha Rietmann che fa la FMS a Glion en Surselva. È saja stà sentiments maschadads ils davos dus mais.
L’emprim na savevan nus betg tge che marscha e lura avevan nus mo sentiments negativs per ils politichers ma uss hai jau puspè speranza en il sistem da furmaziun e sun levgià.
Sumegliant è la situaziun en il gimnasi a Mustér. Ils maturands han per 11 dis avant ils examens finals survegnì part ch’ils examens han lieu. E per oz è ì vegni communitgà co las notas vegnan quintadas. Per ch'ils scolars na vegnan betg dischavantagiads perquai ch'ils examens a bucca n'han betg lieu, è vegni definì da nov co las notas finalas vegnan quintadas ensemen. La nota da l'emprim semester quinta per la mesadad, quella dal segund semester e quella da l'examen a scrit mintgamai per in quart.
Communicaziun
Il maturand Flurin Jacomet da Sedrun chapescha che la situaziun cun il coronavirus è era stada nova per ils politichers, tuttina avess el giavischà che tut fiss vegnì communitgà pli baud.
I è mintgatant grev da chapir daco che las decisiuns èn vegnidas prendidas e communitgadas uschè tard.
Uschia ch’è saja stà grev da mantegnair la motivaziun d’emprender ils davos dus mais. Tge che haja mancà il pli fitg a Flurin Jacomet è la structura. Uss hajan els sez stuì organisar e planisar il mintgadi e quai saja stà blera responsabladad.
Tuttina vai era a Svenja Kaib da Laax che fa la matura a la scola chantunala a Cuira. Far ils exercizis da preparaziun ch’inqual scolast metteva a disposiziun haja duvrà disciplina.
È la situaziun gista?
Dad in maun è ella era leda da pudair scriver ils examens e serrar giu uschia cun in punct final – gist chatta ella la situaziun dentant betg.
Ord mia opiniun n’è ì betg gist ch’ils chantuns han decidì different. Jau chat ch’ins avess stuì avair ina soluziun per l’entira Svizra – ma uss è ì uschia.
La finala hajan els il medem diplom sco ils scolars en auters chantuns che na han betg stuì far ils examens finals. Entant han Aljosha Rietmann, Flurin Jacomet e Svenja Kaib acceptà la situaziun – la chapientscha manca dentant.