Sin basa d'ina incumbensa parlamentara ha la regenza laschà intercurir scientificamain la procedura d'admissiun chantunala a las scolas medias. L'incumbensa pretendeva in'admissiun senza examens.
L'expertisa vegn a la conclusiun che la procedura d'admissiun actuala garantescha a tuttas ed a tuts las medemas schanzas per entrar en ina scola media – quai betg sut mendras cundiziuns che en auters chantuns. Ella propona dentant pitschnas adattaziuns.
Ils trais puncts da correctura:
- Optimar la qualitad da la prognosa da la procedura grischuna
- Diminuir il dischavantatg da l'impressiun mumentana dal di d'examen
- Garantir en l'entir chantun in access ad in sustegn minimal che basta da princip per sa preparar per ils examens d'admissiun
Realisar las midadas sin l'onn da scola che vegn
Sin basa da las conclusiun da l'expertisa scientifica ha la regenza grischuna decis da restar tar la procedura d'admissiun d'enfin ussa. Quella cumpiglia uschia vinavant in examen d'admissiun chantunal e che resguarda las notas d'admissiun.
Dentant duai vegnir purschì a partir da l'onn da scola 2023/24 a tuttas ed a tuts las medemas schanzas. Las scolas popularas vegnan obligadas d'offrir da nov pussaivladads gratuitas per sa preparar per ils examens, quai tant scolaras e scolars interessads da la 6avla classa primara sco er da la segunda e terza classa secundara. Tar l'examen d'admissiun a la terza classa gimnasiala ed a l'emprima classa da la scola media spezialisada e commerziala duai plinavant la nota d'admissiun survegnir en l'avegnir ina paisa cumparegliabla cun l'examen d'admissiun a l'emprima classa gimnasiala. Uschia po in'eventuala influenza negativa da la furma dal di durant l'examen vegnir reducida.
