Resumond pon ins dir che Claustra na sto betg mo ir sur ils cudeschs, mabain ha era in problem da structura. Il rapport vegn però er tar la conclusiun ch’i n’haja betg dà delicts da finanzas ubain defraudaziun. Igl ha bain dà sbagls en la contabilitad e da manar la vischnanca ed il persunal. Perquai dat il rapport da 64 paginas er cussegls. Per part èn ils sbagls creschids cun ils onns senza adattar las structuras. In exempel: per 150 persunas che lavuran per la vischnanca datti be in pensum da resursas umanas da 60%.
Vinavant concluda il rapport da la societad da revisiun
- ch'i dettia ina perdita da savida pervia d’auta fluctuaziun dal persunal,
- ch'i dettia memia blers (per part gronds) projects cun bleras persunas involvidas,
- ch'il management e controlling da projects na saja betg unifitgà,
- che la communicaziun tranter las singulas partiziuns saja manglusa,
- ch'i manchia la controlla vicendaivla ed insumma insaquantas controllas internas.
Igl ha dà sbagls en la contabilitad u era tar l'administraziun e la tgira dal persunal. Uschia sajan las collavuraturas ed ils collavuraturs per exempel vegnids stimads memia pauc. Quai è ina da las raschuns per l'auta fluctuaziun da persunal. La tematica dal persunal fatschenta lura er ferm il president communal Hansueli Roth, sco el ha ditg envers il schurnal regiunal da SRF.
Mesiras proponidas
La societad da revisiun incumbensada ha sin basa da sia analisa suttamess a la vischnanca da Claustra differentas propostas. Uschia duain plirs puncts vegnir meglierads – quai munta tranter auter meglra communicaziun, organisaziun e calculaziun en il sectur da las finanzas ed adattaziuns tar cumpetenzas e responsabladads sin livel communal. Er duai vegnir separà meglier il livel strategic ed operativ, vegnir promovì la stima ed il spiert da cuminanza e bajegià ora la partiziun da resursas umanas, quai proponan tranter auter il rapport scrit da Tino Zanett ed Arno Felix dal biro specialisà Curia a Cuira. Tut en tut cumpiglia l'examinaziun administrativa 36 propostas per meglierar la situaziun.
La vischnanca vul reagir
Ils responsabels da la vischnanca da Claustra han tenor atgnas infurmaziuns gia cumenzà cun la restructuraziun – quai gia dapi ch’igl ha dà midadas en la suprastanza communala il 2021. Marco Hobi, il president da la cumissiun da gestiun, ha ditg envers RTR ch’ins saja led per il rapport, uschia san ins nua ch’i dat potenzial da meglierament.