Siglir tar il cuntegn

Header

audio
Experientschas e muntada per Julian Cavigelli
Or da Actualitad dals 26.11.2022. Maletg: MAD
laschar ir. Durada: 3 minutas 53 Secundas.
cuntegn

Expediziun en l'India Tschintg emnas sin viadi en la muntogna dal Himalaja

Julian Cavigelli era passa in mais en l'India sin expediziun. Sin viadi han ins stuì improvisar bler e betg tut è ì tenor plan. Tuttina ha il giuven da Laax pudì rimnar bleras impressiuns positivas ed era profitar da la cultura da l'India.

Ensemen cun il team d'expediziun dal Club alpin svizzer è il mecatronist da pendicularas Julian Cavigelli stà tschintg emnas quest atun en l'India vi dal raiver. Els èn stads sin il Himalaja en la regiun dal Kishtwar ed èn raivids sin il Chumachoir che sa chatta 6'270 meters sur mar.

Il team d'expediziun rampigna sin in piz
Legenda: Il team d'expediziun dal Club alpin svizzer vi da raiver Hugo Béguin

Ils ultims dus onns ha il team trenà ensemen ed è vegnì scolà. A la fin da la scolaziun ha il team fatg questa expediziun. Era cun fitg bler trenament n'han els betg pudì planisar tut. En quest sport saja quai fitg impurtant d'improvisar. Savens han els stuì midar spontanamain la ruta da raiver. La fin finala èn els er raivids sin in auter piz che planisà.

Ti na sas propi betg, sche ti vegns insumma fin sisum. I po esser ch'ins po raiver l'emprima mesadad senza problems e ch'i vegn suenter ina part tar la quala ins n'ha nagina schanza.
Autur: Julian Cavigelli Commember dalla gruppa d'expediziun

Sch'ins va lura fin sisum, sajan ins l'emprim simplamain be stanchel. Pir cura ch'ins è arrivà en il champ da basa pon ins lura propi sa legrar. Spezialmain sa legria lura l'entir team.

En quest temp ha il team gì la schanza d'emprender d'enconuscher in l'auter endretg. Cunquai ch'ins ha passentà quasi mintga secunda ensemen, han ins pudì emprender bler dapli in da l'auter. Al giuven da 24 onns saja il team stà in agid per mantegnair la motivaziun.

I dat blers dis ch'èn lungurus. E ch'ins na perda lura betg la motivaziun èsi impurtant d'avair in bun team. Uschia pon ins sa motivar in l'auter.
Autur: Julian Cavigelli Commember dalla gruppa d'expediziun

Las pli grondas sfidas sin il viadi èn stadas l'aura e la naiv. Cun quests facturs hai dà pli savens midadas dal plan. Ma propi gronds problems n'han els betg gì.

Per Julian Cavigelli saja quai stà ina gronda pussaivladad d'emprender er bler da la cultura da l'India. Il viadi en l'India ha motivà el da far anc autras expediziuns en l'avegnir. Nua exact na sa el anc betg. Ma cunquai che l'India ha plaschì uschè bain ad el, giess el gugent anc ina giada là.

RTR actualitad 07:00

Artitgels legids il pli savens

Scrollar a sanestra Scrollar a dretga