Siglir tar il cuntegn

Header

audio
Roboters ed autras tecnologias per la vegliadetgna
Or da Actualitad dals 06.10.2023. Maletg: RTR
laschar ir. Durada: 5 minutas 9 Secundas.
cuntegn

Exposiziun a Cuira Roboters ed autras tecnologias per la vegliadetgna

La vegliadetgna: Per ils ins anc lunsch davent e per ils auters gia realitad vivida. Per render pli accessibel las tecnologias per la vegliadetgna ha l'Institut per gerontologia da la Scola'auta spezialisada da la Svizra Orientala organisà ina pitschna exposiziun a Cuira.

«Nao» è in roboter umanoid, pia in roboter che sumeglia in carstgaun. El ha dus egls, discurra, stat sin duas chommas, va en la schanuglia e fa ir la bratscha. Ad in um giuven mussa el gist intgins exercizis da gimnastica. Davos el, en in char-annex, sa chattan anc autras tecnologias. Tranter auter «Paro», in roboter en furma d'in animal da plisch. El guarda ora sco in chaun da mar, ha in pail alv e fin, e tgula sch'ins charsina el.

In cumpogn per persunas cun demenza

Damian Hedinger, collavuratur da l'Institut per gerontologia tar la Scola'auta spezialisada da la Svizra Orientala, di che quest roboter saja vegnì concepì per persunas cun demenza:

Il chaun da mar po animar persunas cun demenza da far adatg dad el ed uschia far insatge che cuntenta els.
Autur: Damian Hedinger organisatur
Roadshow AGE-INT Neue Technologien – Neues Alter(n)?
Legenda: «Paro» – il cumpogn per persunas cun demenza. RTR

Pusada e sensurs da moviment

Il roboter dal Giapun saja gia vegnì vendì pliras milli giadas. I dat dentant era tecnologias pli simplas sco pusada cun in moni gross per che persunas pli veglias pon tegnair enta maun ella meglier. Lura è era anc vegnì mussà in sensur ch'ins po installar vi da la paraid e ch'alarmescha sch'el na senta nagins moviments pli. Uschia pon ins evitar ch'ina persuna resta ditg per terra sch'ella è stgarpitschada.

La finamira da l'exposiziun

L'idea da l'exposiziun che vegn fatga en plirs lieus en Svizra è da render pli accessiblas las tecnologias al public. Impurtant saja era ch'ins vegnia en discurs cun las persunas interessadas, di l'organisatura Samira Hüsler.

I n'è betg l'idea che las tecnologias remplazzian il carstgaun mabain ch'ellas rinforzian l'autonomia e la segirtad da las persunas en la vegliadetgna.
Autur: Samira Hüsler organisatura

La tecnologia saja pir anc a l'entschatta e stoppia per gronda part anc chattar la via en ils dachasas ed en las chasas d'attempads.

RTR actualitad 07:00

Artitgels legids il pli savens

Scrollar a sanestra Scrollar a dretga