-
Bild 1 von 14. Ottilia cun trais onns enturn il 1907 picturada dal bab Giovanni Giacometti. Bildquelle: posssess privat.
-
Bild 2 von 14. "Sulegl d'atun" da Giovanni Giacometti enturn 1908. Bildquelle: chasa d'art a Turitg.
-
Bild 3 von 14. Act d'ina matta da Giovanni Giacometti il 1910. Bildquelle: Chasa d'art Turitg.
-
Bild 4 von 14. "Ottilia avant il spievel" da Giovanni Giacometti, il 1912. Bildquelle: Museum d'art Winterthur.
-
Bild 5 von 14. "Ottilia al clavazin" da Giovanni Giacometti, 1912. Bildquelle: posses privat.
-
Bild 6 von 14. Il bab Giovanni pictura Ottilia en ses plaz preferì en stiva sin canapé. "Pensierosa" dal 1913 è sin il frontispizi dal catalog da l'exposiziun actuala. Bildquelle: possess privat.
-
Bild 7 von 14. "Annetta ed Ottilia cusan" da Giovanni Giacometti enturn 1918. Bildquelle: possess privat.
-
Bild 8 von 14. Alberto ed Ottilia en il guaud a Stampa enturn 1923. Bildquelle: Fotograf nunenconuschent, possess privat.
-
Bild 9 von 14. Ottilia sin il Piz da la Margna il settempber 1924. Bildquelle: fotograf nunenconuschent.
-
Bild 10 von 14. "Tête d'Ottilia" dad Alberto Giacometti enturn 1925. Bildquelle: Fondation Giacometti.
-
Bild 11 von 14. Skizza per in placat dal teater "La Stria" da Giovanni Giacometti enturn 1930. Bildquelle: possess privat.
-
Bild 12 von 14. "Ottilia en giacca melna" da Giovanni Giacometti, 1931. Bildquelle: Posses privat.
-
Bild 13 von 14. "Ottilia sur son lit de mort" dad Alberto Giacometti, il 1937. Bildquelle: chasa d'art a Turitg.
-
Bild 14 von 14. "Silvio" dad Alberto Giacometti il 1937. Bildquelle: Chasa d'art Turitg.
Ella è la nunenconuschenta en ina famiglia da spir renumads: il bab Giovanni ed ils frars Alberto e Diego eran artists, il frar Bruno architect. Ottilia n’era nagina artista. Forsa gist pervia da gliez empermetta l’exposiziun in’invista intima en la vita dals Giacomettis.
«L’exposiziun mussa la ferma affecziun che univa ils fragliuns e geniturs», di il curatur Casimiro di Crescenzo.
Ottilia nascha il 1904 e crescha si a Stampa e Malögia. Ella giauda in’educaziun da figla da buna famiglia, visita internats e pensiunats a Horgen u Losanna. Sia passiun è il taler ed ella cusa gugent – occupaziuns tipicas per dunnas da lez temp.
Ils fratellis artists
Cura ch'ils uffants èn creschids, è la famiglia decennis a la lunga separada: ils geniturs vivan a Stampa, ils fragliuns a Turitg, Genevra u Losanna. Tuttina tegnan els stretg contact e scrivan mintg’emna in a l’auter.
Casimiro di Crescenzo ha legì passa 1600 brevs dals Giacomettis ed enconuscha uschia bain mintga commember da famiglia. En sias brevs numnia Ottilia ses frars adina «ragazzi» – era sche Alberto e Diego eran pli vegls ch’ella. Il frar giuven numna ella «Brunetto» u «Brunettino».
«Ottilia era ina persuna fitg sulegliva ed aveva in bellezza surir»
Sia tempra manca malamain a la famiglia cura ch'Ottilia mora cun 33 onns curt suenter la naschientscha da ses figl.
Il frar Alberto dissegna sia sora sin pugn da mort ed era il fegl novnaschì en tgina: Las duas skizzas da rispli cuntrasteschan fermamain – ina dissegnada cun stritg dir, absent da tutta vita, e l’autra cun in rispli lom e miaivel.
«Quests dus dissegns evocheschan in’emoziun fermischma», di Casimiro di Creschenzo.
Suenter la mort da la sora fa Alberto ina busta dad Ottilia. En brevs scriva el, sch'el craja d'avair reussì, daventia la sumeglientscha e la dolur uschè ferma ch'el stoppia smetter da lavurar.
L’exposiziun cumenza dentant cun l’uffanza e cun ils maletgs ch’il bab Giovanni ha fatg dad Ottilia – sco poppa en sdratscha sin bratsch da la mamma, sco mattetta vestgida da naivalva, sco matta che fa chaltschiel u pli tard sco bellezza dunna giuvna.
Ses purtrets plain glisch e colur – era da tschels uffants – mussian l’affecziun ch’il bab avevia per ses uffants, di il curatur Casimiro di Creschenzo. Ils uffants dastgiavian ir en ed ora en l’atelier durant ch’il bab lavuravia.
«I regeva ina communitad absoluta tranter la lavur artistica dal bab e la vita da famiglia», di il curatur.
Radund 80 dissegns, purtrets, picturas e sculpturas mussa la chasa d’art a Turitg. Per part sa tracti da maletgs ch’èn gia daditg betg pli stads exponids e singuls maletgs èn anc mai stads da vesair. Dus moniturs preschentan plinavant documents da film ch’il public n'ha fin uss anc mai vis.
Fin ils 19 da fanadur
En sasez avess l'exposiziun durà be fin ils 3 da matg. Uss vegn ella prolungada damai ch'ella fiss uschiglio stada averta pervia da corona mo bundant in mais.