Ils animals masculins han in dies brin, il rest dal corp è verd cler ed ha dapertut puncts nairs ed alvs. La femella è cumplettamain brina cun puncts nairs ed alvs. Ils puncts dattan dal reminent era il num a l'animal: luschard taclà.
Quests reptils, che vegnan radun 20 centimeters lung, entaupan ins quasi en l'entir chantun Grischun, sco il directur dal museum, Ueli Rehsteiner, di envers il schurnal regiunal dad SRF.
Il pli aut punct en Svizra nua ch’il luschard taclà viva è en l’Engiadina Bassa – sin 1'600 meters sur mar.
Metter il focus sin in animal che va uschiglio savens sut
Malgrà che bunamain mintga persuna ha gia pliras giadas vis in luschard, dettia tuttina pliras raschuns daco che quella spezia duai per il mument survegnir in plaz spezial en il museum:
Els èn mintgamai uschè svelt davent. En il museum pon ins ina giada guardar propi da rudent ils luschards ed er emprender d'enconuscher la vita da quest animal.
Ma, il museum mussa er nua che la vita d'uman e dal luschard taclà sa cruschan e co ins po proteger ils els.
In animal periclità
Da las quatter spezias da luschards ch'i dat en il Grischun, è il luschard taclà dentant il pli periclità. Damai ch'i dettia adina pli darar mantuns da crappa u roma, sco era chaglias che giaschan enturn u dastgan crescher libramain, svanescha era il spazi da viver da quests animals adina pli fitg.
Cun quella exposiziun speziala less il Museum da natira a Cuira era animar las visitadras ed ils visitaders da s’engaschar per quests animals, di Ueli Rehsteiner envers SRF:
In zichel dapli dischurden da nus, mettess puspè in zichel pli en urden il mund dals luschard.
Pia sch'ins ha in iert, simplamain laschar star in pitschen chantun e metter là in per craps, roma, laschar crescher il pastg ed uschia puspè porscher in dachasa als luschards periclitads.