Bab e figl eran conscients che dus commembers da la medema famiglia na dastgan betg seser ensemen en il cussegl communal. «Nus n’avain dentant betg quintà che Fabio, il figl, vegnia elegì gia l’emprima giada cura ch'el sa metta a disposiziun», uschia il bab Jürg Rodigari.
Leva decisiun
Il bab ha fatg cun 1’500 vuschs bunamain il dubel uschè bleras sco il figl. El è schon cusseglier communal e po uss anc restar in’ultima perioda cusseglier. Uschia saja la decisiun stada ina simpla, di Fabio Rodigari.
Jau lev surtut sustegnair ils candidats da la glista. Perquai èsi stà cler per mai da la bell’entschatta, sch’i dettia questa situaziun, ch’è vegnida surprendentamain, che mes bab surpiglia il post.
Per il giuven da 19 onns èsi vinavant stà impurtant da mussar a la giuventetgna, che la politica pertutgia er els. Ch’ins possia vegnir elegì sco giuven, che mintga vusch chaschunia ina differenza.