Tut ils pizs dal Grischun sur 3'000 meters na sajan quels 460 betg, precisescha Fadri Ratti, «quatter èn en il Parc Naziunal Svizzer, ed uschia betg accessibels». Nagin problem per il preditgant da Favugn, quai sappia el acceptar fitg bain. E quai na reduceschia era betg sia prestaziun. El è l'emprima persuna ch'è reussì dad esser stà sin ils 460 piz.
Ina casualitad tut speziala
Che l'ultima muntogna sin sia glista è stà il Torrone Orientale è plitost casualitad. La muntogna da 3'333 meters autezza ha el dumagnà ils 17 d'avrigl da quest onn pir en ina terza tentativa. Il plaschair dad esser sin la muntogna saja perquai forsa era stà pli spezial, raquinta Ratti. Larmas dal plaschair e larmas dal surlevtg sajan schon curridas, da l'autra vart saja quai era stà in mument da gronda engraziaivladad, sa regorda l'um da 58 onns.
Ir en muntogna saja per el adina stà ina sort meditaziun, ina sort esser manaivel a Dieu. Gia sco giuvenot saja el stà sin ina muntogna da 3'000 meters. L'idea ubain plitost il giavisch dad esser stà ina giada sin tut las muntognas da 3'000 meters saja dentant creschì pir avant bun 20 onns e dapli muntognas nudadas en la glista da success e pli gronda che la motivaziun ed il regl da cuntanscher la finamira saja daventada cul temp. En il center saja dentant adina restà il simpel plaschair dad ir en muntogna.
Or da l'archiv
Tge attira in reverenda d’ir en muntogna? Tge experientschas fa el cur che el va ora e si – encunter la pizza? Il 2013 aveva Chatrina Gaudenz discurrì cun Fadri Ratti davart la spiritualitad e las muntognas.
Betg mo ina tura da tut las muntognas sur 3'000 meters datti, Norbert Joos e Peter Gujan han fatg il 2005 ina tura da cunfin tras l'entir Grischun.