Batist Spinatsch è cuntent cun la racolta da fain fin qua. Tenor il manader da la purschida da cussegliaziun dal Plantahof constat betg mo la quantitad, mabain era la qualitad. Quella bilantscha positiva vegn dentant disturbada da la schlett'aura che ha dominà las davosas emnas. Ils blers dis da plievgia han retardà la racolta en tschertas regiuns. Oravant tut bains purils ch'èn situads en ils auts u ch'han spundas sumbrivantas han gì per part fadia. Uschia sajan in pèr purs e puras anc vid l'emprim tagl tge che corrispundia ad in retard da duas emnas.
Il retard ch’è il resultat da la schlett'aura ha augmentà il squitsch dad era far fain sche las cundiziuns èn main favuraivlas. Uschè hajan per exempel intgins purs e puras era fatg fain cura che la previsiun da l’aura era pauc segira, manegia l'expert dal Plantahof. Sch'il fain vegn bletsch è quai problematic, perquai che la plievgia lava ora il nutriment e reducescha uschia la qualitad dal fain.
La consequenza da questas lungas fasas da schlett'aura è, che tut il fain sto vegnì fatg entaifer fitg curt temp. Quai maina tar ina situaziun fitg malempernaivla per ils purs e las puras.
Stuair far tut quai ch'ins fascheva normalmain en duas fin trais emnas en ina suletta emna – dat in squitsch enorm sin las famiglias cun manaschis.
Era a lunga vista po questa furtina chaschunar donns. Il terren reagescha pli sensibel sin la gronda paisa da las maschinas da racolta sch'el è umid. Sch'il terratsch vegnia donnegià memia fitg – possia esser ch'i cumenza a crescher flurs che n'èn betg giavischadas. U era ch'i na crescha en general betg uschè bler pli, sin il terren ch’è vegnì zappitschà ensemen.
