La sonda passada da las 21:00: Il Welschdörfli a Cuira s'emplaina plaunsieu cun glieud che vul far festa. Insatge che dat immediat en egl: Bunamain nagin porta ina mascrina da protecziun. Bain hai pli pauca glieud che l’emna passada, dentant er questa giada avess il tegnair distanza potenzial da sa meglierar.
La sanadad dals giasts sco prioritad
Da quai ch’ins ha vis, sa tegnan ils ustiers bain vid las prescripziuns da las autoritads. Prest mintga bar u club ha gì a l’entrada ina persuna ch’ha controllà e prendì si las persunalias en il cas, ch’i dat ina infecziun ed ch’igl è da contactar tut las persunas ch’han potenzialmain pudì s’infectar cun il virus. Markus Walther, ch’ha ina firma da segirezza, stat avant l’entrada d’ina bar e guarda exact sin ils visitaders.
I saja ina situaziun difficila e la glieud stoppia collavurar. Ils blers han chapientscha ch'els ston inditgar las persunalias. Era Roni Szepanski, il schef dal club grond «Selig», vesa quai sumegliant: «Ils blers chapeschan questa mesira. Mo darar datti in che vul betg inditgar las persunalias. Quellas persunas n’èn betg bainvegnidas en mes club».
Roni Szepanski ha era giugà cun il patratg da serrar voluntarmain il local fin che la situaziun è sa calmada, dentant saja quai il fauss signal. Il Cussegl federal haja dà glisch verda da puspè avrir ils clubs cun restricziuns. L’incumbensa dal club saja da resguardar quellas mesiras.
In privel invisibel
Roland Alder maina dapi 32 onns la «High-Five Bar» en il Welschdörfli. I saja ina situaziun curiusa. Ins na sappia mai, sch'il virus entra insacura era en l’atgna bar. Quai ch’avess la consequenza da stuair serrar la localitad, malgrà ch’ins ha gist puspè pudì avrir. La tema saja omnipreschenta.
Cun l’alcohol va la responsabladad a perder
Pli tard ch’i vegn, dapli alcohol vegn consumà. Entant vegnan las vias adina pli plainas. Be paucas persunas portan ina mascra, sco per exempel Matthias Zbinden dal chantun Argovia.
Per el èsi cler, ch’igl è da purtar mascra. I dettia ussa glieud pli veglia che stoppia quintar sin la giuventetgna. In auter respunda sin la dumonda pertge ch’el n’haja betg ina mascra:
Quai n'è betg in bal da mascras.
Tut en tut hai dà pli paucas persunas en il Welschdörfli che anc avant in’emna. Dentant haja dà gronds rudels da glieud sin las vias, nua ch’ina infecziun fiss senz’auter stada pussaivla. La polizia ha adina puspè marcà preschientscha, dentant senza intervegnir.
