Las interpresas Caminada Group e The Living Circle cumpran ensemen ils bajetgs a Farschno, nua che la Caminada Group è activa gia dapi onns cun ustarias ed hotel. Per la cumpra han las partidas involvidas fundà la Schloss Schauenstein SA, sco in'annunzia sin la pagina d'internet d'Andreas Caminada mussa. La finamira saja da collavurar en differents secturs, e da sviluppar vinavant ils manaschis a Farschno.
19 puncts e 3 stailas
Gia dapi il 2003 ha il cuschinier Andreas Caminada prendì a fittanza il Chastè da Schauenstein a Farschno. En il chastè ed en bajetgs vischins maina la Caminada Group cun 19 puncts da GaultMillau e 3 stailas da Michelin – duas ustarias cun chombras ed ina pasternaria, ed il Boutique Hotel Schloss Schauenstein. En tut dumbran ils manaschis a Farschno 74 emploiadas ed emploiads.
Sco la possessura da fin ussa, la fundaziun Heinrich Schwendener scriva, sajan ins fitg cuntents d'avair chattà insatgi che sviluppia vinavant quest lieu spezial. En in rapport da la revista «Bilanz» è il Chastè da Schauenstein vegnì schazegià sin 20 milliuns francs. L'um davos la firma cumpradra The Living Circle SA è Gratian Anda. L'ertavel da 53 onns da la famiglia Bührle administrescha ina gruppa da hotels ed ustarias da luxus, per exempel a Turitg ed ad Ascona.
