Normalmain fiss uss il temp da l'onn nua che fatschentas da sport vendan u ffittan in ski u in'aissa suenter l’autra. Dentant è quai betg il cas en las fatschentas da sport dumandadas en differentas regiuns. Per exempel a Zuoz en Engiadin’Ota èn las cundiziuns da las pistas e loipas bunas, grazia a las temperaturas bassas ed uschia la pussaivladad da producir naiv artifiziala. Niculin Arquint, il possessur da la fatschenta Willy Sport, di che blera glieud cumpra chalzers per ir a chaminar. Els vendian pli pauc material da skis ch'auters onns, dentant sa vegn il minus da tegnair en rom.
Igl è forsa stà in auter cumportament, ch'intgins n'èn betg ids sin pista ma a spass.
Er il Sport Beat a Breil venda tenor Renato Livers dapli material da sport per dador, surtut chalzers. Material da cursa lunga n'è betg dumandà, cun quai che mo paucas loipas èn avertas. Auter è la dumonda tar la scola da skis, Renato Livers discurra perfin da dapli uffants che l’onn passà.
Quai è ina speziala situaziun per nus cun uschè pauca naiv, nus n'essans betg usitads.
Bleras clientas e clients ha er la fatschenta Catrina Sportshop a Mustér, er sch'i para a Sabina Piperata ch'i ha en general in zic pli pauca glieud a Mustér. Il team da la fatschenta sez è surstà, ch'uschè blera glieud cumpra skis, er sche las cundiziuns da las pistas èn betg optimalas.
La glieud vegn ad empruvar e cumprar skis, er sche mo paucas pistas èn avertas.
