La radunanza communala da Favugn ha approvà la revisiun parziala da la planisaziun locala. Cunquai vegn la planisaziun adattada a las prescripziuns dal chantun ch'èn sa midadas dapi la davosa revisiun il 2006. Il nov plan directiv dal chantun vul far ina fin a la construcziun dischordinada. Ina revisiun cumpletta na saja betg necessaria, scriva la vischnanca avant la radunanza communala. La revisiun sto anc vegnir approvada a l'urna.
Plinavant han ils da Favugn integrà la planisaziun dal traffic plaun en il plan general d'avertura. Tranter auter ina nova via da velo cun ina punt sur il Rain ora, vi Domat.
