Georg Maurer (61) tutga adina tar il ravugl dals favorits. Sia fermezza saja la part mentala. «Ils auters tiradurs èn mentalmain ferms – jau sun fitg ferm». Quai trenescha el er mintga di, integrescha exercizis en il mintgadi. Ed adina puspè lavura el cun maletgs, cura ch'el descriva ses success. Focussar saja insatge, sa concentrar insatge auter - e cler saja ch'i dovria mintga toc da puzzle per vegnir la finala al maletg cumplet. «Mes maletg da rètg da tir è ussa cumplet».
In plaschair senza fin
Da gudagnar il titel da campiun a la festa da tir federala, ed uschia sa numnar retg da tir, saja in sentiment tut spezial. «Gudagnar quel titel a chasa è vairamain in siemi che va en vigur». E spezial saja da pudair parter il success ed il plaschair cun tut ses collegas da tir. Era sche sajettar saja in sport singul - il success saja mo pussaivel en gruppa e cun lavur da gruppa.
Milli gratulaziuns e dapli
El saja tut perplex, tge eco che ses titel haja gì, raquinta Georg Maurer en sia chasa a Favugn. «Suenter mes titel ha jau survegnì messadis, gratulaziuns e telefons senza fin». Quai sajan per exempel passa 900 messadis da whatsapp - latiers vegnian anc mails e telefons. Insatge ch'el n'avessia mai pensà e na vegnia surtut mai ad emblidar.