Paucs dis suenter il start uffizial da la campagna da la perscrutaziun da Citizen-Science che analisescha maletgs d'odi hai dà ina cyberattatga sin la pagina d'internet dal project «In maletg violescha dapli che 1'000 pleds». Quai communitgescha la Scola auta spezialisada dal Grischun.
Tgi che saja responsabel per l'attatga ed ils motivs saja nuncler, scriva la scol'auta vinavant. Probabel saja dentant ch'insatgi veglia disturbar la mira da la perscrutaziun d'analisar odi en la rait e da cumbatter quel. Datas persunalas u sensiblas na sajan betg stadas periclitadas perquai ch'ins haja preventivamain prendì mesiras da segirezza. Il virus era pir suenter dus dis e mez davent dal tut.
La finamira dal project «In maletg violescha dapli che 1'000 pleds»
La finamira dal project è da survegnir datas representativas tgi che trametta maletgs d'odi, cunter tgi ch'i sa drizzan e sin tge plattafurmas ch'ellas vegnan derasadas. Sin questa basa vulan ins lura prender mesiras. Il project da la Scola auta spezialisada dal Grischun e da l'Universitad da Friburg vegn sustegnida da l'Uffizi federal da communicaziun.