La Scola auta spezialisada dal Grischun po guardar enavos sin in onn da gestiun legraivel. Tenor communicaziun ha ella fatg sut il stritg in lev gudogn da 42’000 francs. Budgetà è stada ina perdita dad in mez milliun francs. Cumpareglià cun l’onn avant saja il retgav s’augmentà per bunamain 6% sin 65 milliuns francs.
Passa 300 projects da perscrutaziun
Il volumen da perscrutaziun saja vegnì augmentà il 2022 sin 11,4 milliuns francs. Quai èn var 10% dapli che l'onn avant. En tut hajan perscrutadras e perscrutaders lavurà vi da passa 300 projects. Il sustegn chantunal per la FHGR era il 2022 vegnì augmentà da 15 milliuns sin 16 milliuns francs.
L'onn passà han passa 2'300 persunas studegià a la Scola auta spezialisada dal Grischun. Quai è in zic pli pauc ch'anc il 2021.
En la communicaziun menziunescha la FHGR er l'avertura da dus lavuratoris a Glion e Stampa (Bregaglia). Cun quai hajan els expandì lur preschientscha e rinforzà la collavuraziun tranter perscrutaziun e pratica.
