A Fideris en il Partenz è in um da 69 onns mort cura che in'abitaziun ha brischà. Tar il fieu la notg sin il mardi, hajan ils pumpiers chattà l'um immobil per terra, communitgescha la polizia chantunala. A dus giasts da l'um saja anc gartegià da bandunar l'abitaziun avant ch'ils pumpiers eran al lieu.
Constatà il fieu ha in vischin ch'ha curt avant las 02:00 alarmà la Polizia chantunala grischuna. Plinavant èn stads 30 pumpiers dal Partenz Central en acziun. Tenor la polizia è la raschun dal fieu anc betg clera.