Siglir tar il cuntegn

Header

cuntegn

Fieus artifizials Adina dapli scumonds – ma betg dapertut

Passa trais quarts da la populaziun Svizra sustegnan ina iniziativa, che vul scumandar fieus artifizials per persunas privatas. Tar ina retschertga dal portal da novitads Watson han 76% dals dumandads ditg ch'i sustegnian in scumond, oravant tut per la protecziun dals animals ed encunter la polluziun da l'aria. L'iniziativa vul scumandar la vendita ed il diever da fieu artifizial che fa canera per persunas privatas. Products che fan nagina canera ed eveniments professiunals fissan vinavant lubids.

Fieus artifizials èn reglads da chantun e vischnanca

En general vala en Grischun: Tgi che vul brischar fieus artifizials dovra la lubientscha da la vischnanca ubain dal chantun.

Tar mintga vischnanca po in scumond u ina lubientscha esser in pau differenta. Vul dir: tschertas vischnancas scumondan tuttas furmas da fieus artifizials. Autras vischnancas lubeschan era tar in scumond per part tuttina anc fieus artifizials pli pitschens, sco vulcans, fieus bengals etc. Tgi che planisescha da far fieus artifizials, duai perquai adina anc s'infurmar oravant tar la vischnanca, tge ch'è propi lubì e tge betg. Plinavant po er il privel da fieu adina puspè midar la situaziun a curta vista – era l'enviern.

Fieus artifizials en Grischun

Avrir la box Serrar la box

En general vala en Grischun: Tgi che vul brischar fieus artifizials dovra la lubientscha da la vischnanca ubain dal chantun. La responsabladad è definida tenor las suandantas categorias:

  • F1: Fieus artifizials cun privel fitg pitschen che pon vegnir duvrads er en chasa. Per quals è mintgin responsabel sez da duvrar. I na dovra nagina lubientscha.
  • F2: Fieus artifizials cun privel pitschen che pon vegnir duvrads en il liber er en spazis limitads. Ina lubientscha da la vischnanca è necessaria.
  • F3: Fieus artifizials cun privel mediocher che dovran in grond spazi en il liber. Ina lubientscha da la vischnanca è necessaria.
  • F4: Fieus artifizials cun privel grond che mo persunas cun expertisa dastgan duvrar. Ina lubientscha da l’Assicuranza d'edifizis dal Grischun è necessaria e la vischnanca decida.

Las vischnancas han differentas prescripziuns. Bleras lubeschan da brischar fieus artifizials il prim d’avust e da Silvester, autras han scumonds generals ubain lubeschan il diever. Ina survista porscha la charta da RTR, per infurmaziuns detagliadas stat l'administraziun communala correspundenta a disposiziun.

Las reglas da segirtad e directivas èn da chattar tar l’Assicuranza d'edifizis dal Grischun.

Or da l'archiv:

Gia dapi onns vegn discutà davart fieus artificials, tant da silvester so era dal Prim d'avust. Qua ina vista umoristica.

audio
Bumm! – Adina quests fieus artificials
ord Uorschla Cranzla recloma dals 03.08.2017. Maletg: RTR
laschar ir. Durada: 1 minuta 44 Secundas.

RTR novitads 10:00

Artitgels legids il pli savens