Il drama muntagnard vegn ora dal tuttafatg senza stars u acturs professiunals. Il reschissur da Basilea Michael Koch, ha lavurà sulettamain cun laics. Simon Wisler è pur a Parpan, chau d'alp e president da la chascharia d'alp a Parpan. Igl haja gidà che nagin dad els haja gì experientscha ed il sustegn da l'entir team da film e dal reschissur saja stà enorm.
Ad ina festa sun jau vegni dumandà sche jau pudess m'imaginar da far part d'in film. Per ch'igl saja spert puspè quiet hai jau ditg gea.
En sasez na vuleva Simon Wisler gnanc giugar en il film. Tras ina massa schabetgs saja el glischnà viaden en quest project. Il reschissur Michael Koch haja insistì uschè ditg, ch'el haja insacura simplamain betg pli pudì dir na. Per l'um da 40 onns saja ina da las pli gronda sfida persunalas stada, che ses manaschi giaja vinavant quel temp ch'el era davent. Per ils radund 60 dis da filmar pendulava Simon Wisler da Parpan en il chantun Uri nua che l'istorgia gioga. Durant ch'el era davent han amis, famiglia, ses dus figls, vischins e pasters sustegnì a chasa ch'il manaschi puril marschia.
«Drii Winter»
En il film daventa Simon Wisler «Marco» che vegn da la bassa en las muntognas da l'Uri per lavurar. El s'inamurescha en Anna che ha ina figlia or d'ina relaziun avant. Els dus maridan, ma il destin na manegia betg bain cun els dus. Marco sa deporta curius e survegn la prognosa d'in tumor en il tscharvè, quel mida sia persunalitad. El daventa anc pli retratg che avant.
Parallelas e differenzas
Sco il protagonist dal film è er Simon Wisler oriund da Willisau ed er el ha avant prest 20 onns stuì chattar ses plaz sco immigrà en la pitschna vischnanca Parpan. Quai sajan lura dentant er schon tuttas parallelas. Dal caracter sajan las duas persunas totalmain differentas. El saja plitost quel dals pleds di Simon Wisler, ed insumma betg quel che taschia e sa retiria.
Igl era grev da restar quiet.
E da mussar tut quai ch'el schess uschiglio cun pleds cun expressiuns ed emoziuns. Far part dal film saja per el in'experientscha extraordinaria ed haja er procurà per novas amicizias. Cun quai ch'il film ha grond success, survegn er Simon Wisler bler'attenziun. Quai saja surtut strentg e na propi simpel per el. Il pli gugent saja el schon en stalla.