En il film cun il titel «Unser Vater» discurran sis fragliuns da lur «bab», il spiritual catolic Toni Ebnöther, ch'ha gì en ils onns tschuncanta e sessanta plirs uffants cun differentas dunnas. El è tranter auter er stà en il Grischun, uschia sco vicari a San Murezzan e vers la fin dals onns tschuncanta enfin sia mort il 2011 en il Partenz. Tranter auter ha el er manà in'ustaria a Saas.
In film davart il taschair ed il turpetg
Il film «Unser Vater» saja dapli ch'in film davart abus sexual. I saja in film davart il taschair ed il turpetg da questa generaziun, di il reschissur Miklós Gimes. Il film mussia che bleras famiglias hajan misteris e chaussas che vegnan taschentadas. Ils sis fragliuns ch'èn tranter 55 e 72 onns han decis da betg pli far quai. Els raquintan da lur destin e dals destins da lur mammas. Lezzas avevan da lez temp gì sex cun il spiritual, per part sfurzadamain. Suenter han ellas taschì e purtà il burdi cun ellas.
Tge savevan la baselgia e l'uvestgieu?
Pervia dal cumportament dal spiritual Ebnöther haja gia baud dà malruaus, quai gia en ses emprim post sco vicari a San Murezzan. El haja contact e visitas da dunnas, ha il plevon da lezzas uras annunzià a l'uvestgieu. Suenter diversas admoniziuns ha la baselgia lura tramess el a Bülach. Er en auters lieus haja dà raquints sumegliants ed era notizias. Confermas ch'igl haja dà uffants na sajan dentant betg da chattar en ils archivs da l'uvestgieu u las plaivs. Quai mussan uschebain las retschertgas dal reschissur Miklós Gimes sco er las retschertgas da l'uvestg Joseph Maria Bonnemain. El era vegnì a savair dal cas il 2014, cura ch'ina da las figlias era vegnida a raquintar. En il rom dal film ma er gia avant era l'uvestg Bonnemain s'inscuntrà cun ils sis fragliuns per sa perstgisar tar els. El conceda la culpa da la baselgia e da las persunas involvidas da lez temp.
Elavurar cas en la baselgia
La Baselgia catolica ha fatg divers pass per elavurar abus e maldiever per evitar tals cas. I dat in concept da protecziun ed in fond d'indemnisaziun. Actualmain vegnan ils abus elavurads er scientificamain. Las duas istoricras Monika Dommann e Marietta Meier fan uss in studi da pilot en collavuraziun cun l'Universitad da Turitg. Tranter auter fan ellas intervistas cun victimas e perditgas dal temp. Emprims resultats èn previs per l'atun che vegn.