La regenza vul promover films per il Grischun ed ha perquai approvà in model correspundent ch'è vegnì elavurà dal cineast grischun Hercli Bundi en incumbensa da la Promoziun da la cultura dal Grischun. Quai communitgescha il chantun. La promoziun duai includer tut las fasas per projects da films: dal svilup dal script fin la distribuziun.
Promovids duain vegnir projects da film cun participants grischuns che giogan ina rolla decisiva u films cun cuntegn che ha in connex cun il Grischun. Exclus da la promoziun sajan producziuns sulettamain commerzialas sco films da reclama e films d'incumbensa.