Cifras cotschnas eran avant paucs onns anc normalitad en ils quints annuals da las vischnancas grischunas. Uss mussan ellas per part ora bels gudogns. Tut tenor tge vischnanca ch’ins dumonda, vegnan inditgadas autras raschuns per ils gudogns. Per exempel:
- Dapli entradas da taglia
- Restituziuns da l'auto da posta ch'aveva incassà memia bler subvenziuns
- HRM 2 - il nov sistem da contabilitad
Quellas vischnancas che inditgeschan HRM 2, mussan ora dapli gudogns pervi da las amortisaziuns. Il vegl sistem da contabilitad prevediva amortisaziuns degressivas, il nov sistem lubescha mo pli amortisaziuns linearas, pia gulivas.
E sche tschertas vischnancas scrivevan giu fin uss per exempel ina via nova entaifer 10 onns, sto quai uss succeder entaifer 40 onns. Ins sto pia scriver giu pli pauc ed il quint annual mussa perquai ora dapli gudogn che fin uss – malgrà ch’i n’ha betg dapli daners en la cassa communala.
Sutvalitar è scumandà
Era amortisaziuns spezialas u reservas zuppadas n’èn cun il nov sistem da contabilitad betg pli lubidas. «En il vegl sistem pudevan ins anc sutvalitar aczias che figuravan cun mo 1 franc en la facultad da finanzas», di Thomas Kollegger da l’uffizi da vischnancas. «Quai n’è uss betg pli lubì».
Perquai èsi pussaivel che la bilantscha mussa ora d'in onn sin l’auter tuttenina grondas summas en la facultad da finanzas.
RR actualitad 17:00