- Trair giu custs da scolaziuns: ins po trair giu scolaziuns supplementaras che pertutgan la professiun. Vul dir: in fiduziari po trair giu ils custs per ina scolaziun da fiduziari, dentant betg per in curs da malegiar.
- Spesas da lavur: là ston ins far la differenza tranter persunas che han ina dimora durant l’emna. Questas èn tenor Arno Felix en ina buna situaziun pertutgant la taglia. Per exempel pon ellas trair giu parts da l’abitaziun, parts da las tschaveras. Las persunas che stattan adina al medem lieu, na pon betg trair giu l’abitaziun. Il gentar pon ellas mo trair giu sch’ellas abitan dapli che 30 minutas davent dal lieu da lavur, alura èn quai 30 francs per di.
- Auto via leasing: Sch’ins ha in auto via leasing, pia sch’ins paja mintga mais ina summa, alura na pon ins betg trair giu quai da la taglia. Motiv è che l’auto n'è en quest cas betg en il possess da la persuna.
- Custs d’immobiglias: Ensasez pon ins mo trair giu custs d’immobiglias che mantegnan la valur, betg custs ch’augmentan la valur d’ina immobiglia. Auter è quai sche ils custs per las lavurs vi da la chasa u abitaziun èn per spargnar energia, alura pon ins trair giu quai. Per exempel novas fanestras u in indriz solar.
- Criptomunaida: Tar Bitcoins, la pli gronda criptomunaida ha la Confederaziun publitgà ina glista da valurs. Dentant datti anc millis autras e questas èn savens sin divers contos. Quai è grev per la persuna da savair tge valur inditgar. Da l’autra vart èsi grev per ils uffizis da taglia da controllar sche tut è inditgà.
Cura ch’ins emplenescha ora la decleranza alura èsi forsa memia tard per vulair spargnar impostas.
S’organisar finanzialmain: studegiar versus lavurar
Niculin Magni e Nadine Arpagaus èn duas persunas giuvnas ch'èn dentant en tut autras situaziuns da vita. Niculin Magni studegia fisioterapia, abita persul a Cuira en ina abitaziun e survegn sustegn finanzial da ses geniturs. Nadine Arpagaus percunter lavura dapi ses emprendissadi sin banca, stat a chasa tar ses geniturs ed investescha raps per il futur. Omadus èn spargnus e guardan regularmain sin lur contos. Nadine Arpagaus ha 23 onns e paja mintg’onn insatge en la terza pitga, sper quai ha ella ina part da ses daners en aczias. Ils gronds posts ch’ella sto pajar è la cassa da malsauns, assicuranzas e las taglias. Niculin Magni percunter na paja nagut en la terza pitga. El na pudess betg pajar sez l’abitaziun a Cuira, la cassa da malsauns, las assicuranzas ed ils custs da vita – perquai survegn el sustegn dals geniturs. El ha 24 onns e guarda da betg dar ora memia blers raps, per exempel ha el definì per sasez in budget da 50 francs l’emna per mangiar. Quai èn duas situaziuns tut diversas che mussan dus exempels da persunas giuvnas e lur situaziun finanziala.
