I savura bain or da la stanza da producziun da la pasternaria fina, conditoria e confisaria Crest a Flem. Maschinas ramuran. Surfatschas da metal, cars per transportar plechs, stgadellas ed utensils da tuttas sorts sa chattan en la stanza. Dapi las tschintg la damaun èn las trais pastizieras-confisieras a la lavur – uschia era Sarina Caduff da Morissen che ha cumenzà l'entschatta avust ses emprendissadi.
Ella porta chautschas da lavur, in t-shirt alv ed in scussal. La matta da 15 onns ha lià ses lungs chavels stgirs ad in chignon. Sper quella mesira d'igiena n'èsi era betg lubì da purtar bischutaria e dar colur a las unglas. Oz en damaun ha ella gidà da preparar sandwichs, salatas e buglias da Bircher per la butia. Cura che quella lavur è finida suonda la producziun da pastizarias che na ston betg vegnir furnidas en il mument.
Quest di fa Sarina Caduff confect – ina sort tustget sco ils «Spitzbüeblis». Cun mauns inschignus smatga ella plat la pasta, tatga ensemen stgarps e fa ir la maschinas da zullar ora. Cura che la pasta ha la grossezza e lunghezza giavischada fora ella cors e rudels or da quella.
Decisiun professiunala
Sco pitschna vuleva la giuvna daventar cuschiniera, lura saja quai però sa midà. Suenter plirs fufragnadis en il «Maron» e «Merz» a Cuira ed en il «Crest» a Flem èsi stà cler: Sarina Caduff vul daventar pastiziera-confisiera. A la matta plascha la lavur varianta e creativa e ch'ella po lavurar independentamain. Dapi l'entschatta da ses emprendissadi abita ella durant l'emna en in studio a Flem. Al cumenzament saja stà curius d'abitar suletta, ma ella haja gì ina bun'entschatta.
Per Jessica Buchli, la manadra da la producziun pastiziaria/confisaria e furmatura professiunala han emprendists ed emprendistas in'impurtanza speziala.
Per in manaschi n'èn emprendists ed emprendistas nagina plivalur en il senn da lavurers e lavureras bunmartgadas – mabain ina responsabladad per il futur.
Process d'annunzia
Da principi avess Jessica Buchli gugent mintg'onn in emprendista resp. in emprendist. I na saja però mintgamai betg simpel da chattar in/a. Blers giuvenils e giuvenilas na vulessan ozendi betg pli emprender ina professiun manuala. Quest onn han elsonfisaria gì trais annunzias – quai che saja in dumber normal cumpareglià cun ils davos onns. Per gronda part s'annunzian mattas. Sarina Caduff saja gist ida bain a prà cun il team. Caracteristicas impurtantas èn per Jessica Buchli creativitad, fidadadad e l'abilitad da lavurar en ina gruppa – il pli impurtant saja però ch'insatgi veglia emprender la professiun.
Tenor l'Uffizi chantunal per la furmaziun professiunala è la media dals contracts d'emprendissadi approvads stà stabil ils davos trais onns pertutgant la professiun pasterner/a pastizier/a confisier/a.
Plans per il futur
Sco ch'i va vinavant suenter l'emprendissadi na sa Sarina Caduff anc betg – ella crai ch'ella restia tar quella professiun ma pudess era s'imaginar da lavurar ina giada en in'ustaria u en in hotel. Ella avess la pussaivladad d'anc agiuntar in onn d'emprendissadi cun la direcziun «pasternaria» u d'ir pli tard ad ina scola auta.
Mumentan è Sarina Caduff fatschentada cun insatge auter: Ella ha cumenzà a zullar ora in'autra pasta che sa numna «Turta da Flem». Cunquai che la pasta vegn plaunsieu chauda e loma dat ella da part. La collavurera Nicole Schnider la gida e va per pasta schelada da la frestgera. Suenter in mument decida ella lura però da laschar star per oz – cunquai ch'i sa tracta tar il confect d'in product che vegn producì ordavant, na saja betg nausch sch'i ha d'ina sort dapli products che d'in'autra.
Sarina Caduff sprayescha ils plechs cun in spray da grass avant da metter si ils tustgets. Lura stauschan ella e Nicole Schnider il char cun ils plechs en in grond furnel. Sinaquai prepara Sarina Caduff il satget da sprizzar cun confitura d'ampuaunas per emplenir ils tustgets. Suenter quella lavur ha ella lura definitivamain merità la pausa da mezdi. Circa da las duas astga l'emprendista lura far saira sontga.
