Il spezial vid l'Isla Casti n'è betg be ch'ella è cun radund 630 meters sur mar il pli bass punct da la vischnanca da Flem, mabain ch'ella era abitada durant passa 50 onns. Anton Stury viveva là cun sia dunna e ses set uffants. El vegniva magari er numnà «il Robinson dal Grischun». Stury era quai ch'ins numnass oz in allrounder creativ: El era scrinari, electricist, pestgader, pur e tar insaquants uffants er «spendrera». Daners gudagnava el cun ina tratga da litgivas e mintga di purtava el passa duas uras ditg ils peschs a Flem.
La vischnanca da Flem ha preschentà ils 9 da matg a la radunanza communala il project ch'ella vuless gugent realisar sin l'Isla Casti. Previs è da far in center per furmar rangers, ils survegliaders da la Ruinaulta. Quai center duain dentant er uffants pudair visitar, che vulan emprender insatge sur da la biodiversitad da la Ruinaulta.
Il suveran da Flem ha uss approvà in credit da 300'000 francs ed in emprest dad 1,25 milliuns francs per realisar quest project. 620 persunas han vuschà cun Gea, 202 èn stadas encunter tar la votaziun a l'urna.
