Cunzunt ils auals che mainan aua en l'En ed en il Rain Posteriur han actualmain pauca aua. Quai di Andreas Meraner da l'Uffizi chantunal da chatscha e pestga. La situaziun saja bain tendida dentant anc sut controlla. Datiers da Tusaun hajan ins dentant quest'emna stuì dischlocar peschs perquai ch'els avevan memia pauca aua.
Aua memia chauda chaschuna stress
La situaziun en il Grischun saja dentant autra ch'en la Bassa. Là sajan las temperaturas da las auas il problem, sco Gregor Thomas da l'Uffizi federal d'ambient di.
Pli chauda che l'aua è e pli pauc oxigen ch'ella cuntegna. Pli pauc oxigen che l'aua ha e pli grond ch'il stress vegn per ils peschs.
Cunzunt litgivas e litschalas hajan problems cun temperaturas sur 20 grads e quellas sajan cuntanschidas en blers lieus en la Bassa. En aua chauda è pli pauc oxigen, uschia ch'i saja schizunt pussaivel che peschs stenschian, da quai avertescha l'uniun federala da pestgaders.
La situaziun en il Grischun è tendida dentant betg uschè critica sco en auters chantuns u en l'Italia dal Nord – qua è ella anc sut controlla.
En il Grischun n'è la temperatura da las auas il mument anc betg in problem, mabain il quantum d'aua. Pli pauc aua che flums ed auals mainan e pli pauc spazi ch'ils peschs han. Perquai controllescha l'Uffizi chantunal da chatscha e pestga ch'i na vegn betg prendì dapli aua or da flums ed auals che lubì e tegn er uschiglio en egl la situaziun. Quai per pudair daventar activ, tut tenor era cun dischlocar ulteriurs peschs sche necessari.