Cumenzà avevan las ponderaziuns per il program gia pervi da las faudas en fatscha, che vegnian perfin tar Flurin Caviezel adina dapli. Ma resultà è la fin finala in «concert cabarettistic» nua che faudas da tutta sort mainan atras il program – adina accumpagnà da tocs musicals sunads cun in instrument da massa faudas: l'orgelet da maun. Flurin Caviezel è sez stà surstà quant vast ch'il tema «faudas» è. Da puspè pudair star sin tribuna cun ses nov program fetschia enorm plaschair al cabarettist e musicist.
Sara Hermann dat nov schlantsch
Quest onn datti per l'um, ch'ha ils davos 20 onns adina lavurà cun il medem reschissur, ina gronda midada: Sia nova reschissura è nagina autra che l'actura engiadinesa Sara Hermann, ch'ha cun «Mummenschanz» giugà ils davos onns sin tribunas sin tut il mund. Ina constellaziun che giaja si enorm bain per tuts dus. A Flurin Caviezel dettia Sara Hermann fitg blers novs inputs – quai dettia nov schlantsch a ses «far teater». Ma nagin stoppia temair, che la figura da tribuna «Flurin Caviezel» sa midia dal tuttafatg causa la nova reschissura. Sara Hermann n'haja insumma nagin desideri da midar quella figura da tribuna – ella stimia quella enormamain. Sia finamira saja d'empruvar da rabitschar ora anc pli fitg la flomma ch'ardia en Flurin Caviezel, da purtar quella sin tribuna ed en consequenza tar il public.
Ch'els dus armoniseschan bain è evident tar lur davosas provas curt avant la premiera la sonda saira. Las sgnoccas, il spass ed il rir èn almain uschè part da las provas sco il text, las chanzuns e las instrucziuns da reschia. Uschia ch'i saja per tuts dus cler, ch'els fissian pli che pronts da lavurar era en futur ensemen a quella moda e maniera.