Per pussibilitar novs projects en resguard sin autos electrics, dublescha l'Ems Chemie la vendita ed il svilup da la clientella en China. China è in dals pajais che è a la testa da la tecnologia dad autos electrics. La è uschia in auto praticamain in telefonin sin rodas, di Magdalena Martullo.
En 30 citads dettia schon autos che van cumplainamain automatic, tranter auter ils taxis. Enfin il 2025 duessan tut ils taxis esser uschia numnads «Robotaxis». En Europa n'è quai betg pussibel che nagina persuna sesa davos la roda da manar, cunquai ch'intginas chaussas en betg scleridas, per exempel la prestaziun da las assicuranzas u la lescha.
L'Ems Chemie producescha differentas parts dad autos electrics, tranter auter tocs da la battaria, parts dal sfradentament e tocs da design. Magdalena Martullo è persvasa che autos cumplettamain automatics vegnan era en l’Europa. La Ems Chemie metta il focus sin autos electrics, en in prim pass cun dublar la capacitad en China.
Ems Chemie sbassa prognosas per il 2023
Suenter in emprim mez onn pli difficil sbassa la Ems sias prognosas. Dal schaner fin il zercladur è la svieuta sa reducida per 7,9% en congual cun l'onn passà, sin 1,183 milliardas francs. Senza l'effect dal ferm franc svizzer fissan las venditas però be sa reducidas per 1,9% tenor il concern da chemia speziala.
Nus avain l’onn passà gì il segund meglier resultat en l’istorgia da la Ems Chemie. Uss essans pli bass, dentant anc adina in aut e bun resultat.
Inflaziun e tschains han effect negativ
Surtut l'inflaziun ed ils tschains pli auts influenzeschian negativamain la luna da las consumentas e dals consuments en tut las regiuns dal mund. Las fatschentas novas n'hajan betg pudì cumpensar l'effect dal franc – ed er tar l'industria d'autos sajan las empustaziuns puspè idas enavos, quai malgrà ch'ins haja entant schlià ils problems cun ils chips. Per l'entir onn quinta la Ems Chemie perquai cun damain svieuta e gudogn che l'onn passà.
